Pragelpass
Erlebnisbricht gschribe vo de Susanne
Ganz spontan hät mer de Hubi vom VC Uznach em Fritig aglüted und gfroged eb i mit uf Velotour chume. Do hani natürlich gad zuegseigt, erscht im Nachhinein isch mer gseit worde, dass die Tour scho em Samstig Morge em 5.15h sell starte… Scho zspot gsi, scho zuegseit, do han au i müese i suure Öpfel biisse…
Nach nume zwei Stunde schlofe hät mi de Wecker em vieri em Morge (!) us em Bett grisse. So ganz nachem Motto: «Wenn isch mer e richtige Sportler? – Wenn mer em Wuchenend früener ufstoht als wenn mer go schaffe goht!» No schnell mini 7 Sache parat gmacht und los ischs gange. Ok, nachem 3. oder 4. Alauf isch es los gange, well de Chopf hät no gschlofe und immer hani wieder öppis vergässe mitzneh. So simmer als chlises Grüppli mit em Hubi, em Edi und mir em Sunneufgang entgege pedaled. ÄHM SUNNEUFGANG? Ja genau, der hät wohl verschlofe, so dunkel und chalt wies no xii isch…
Vor Glarus hämmer die erschte Höhemeter in Agriff gno. Die beide Manne händ immer gspöttled wie steil dass do ufe wird werde und si händ mer au scho bitz Angscht gmach demit. Bim Obersee obe hät sich das de relativiert und i ha nümme alles glaubt was mir verzellt worde isch . D Chälti hät mer immer no chli z schaffe gmacht, de Schnee isch immer nöcher cho und d Sunne isch wohl immer no em Pfuuse gsi. Die herrlich Ussicht id Landschaft und der nachendi Gipfel hät mi s’Schlottere aber schnell vergässe loh. Recht zügig simmer de scho ufem höchste Punkt gsi – 1550 müM ufem Pragelpass.
D Abfahrt hani gmüetlich gno, vo luuter Faszination vo dere schöne Natur um mich umme. De Hubi und de Edi sind au ned allzu schnell gfahre, well das Bremse doch ordentlich id Händ gange isch. Unde im Muotatal acho, häts der erscht churz Halt geh zum Wasser nachefülle. S neggschte churze und flache Teilstuck hät d Bei chli erhole loh, bevors de wieder app id Höchi isch uf Illnau mit Vorfreud ufe Kaffipause mit Nussgipfel. Aber well mer ja so früeh abgfahre sind, hät das Reschterand eifach noned offe gha em viertel vor nüni! So händ sich die scho chli müede Bei müese wiiter quäle bis ganz ufe ufd Ibergeregg. De Hubi isch miteme chline Vorsprung oppsi und hät alles geh, dass de Edi und ich ihn ned iholed bis wieder bitz abe gange isch. Das isch ihm au guet glunge, aber sini Bei sind vo det eweg immer nachtragender worde. Aber wer de Hubi kennt, de weiss genau, Indiander kennt ke Schmerz und die Stiigige werded bodiged. S wohlverdiente Kafi mit trochnem Nussgipfel hämmer uf der Ibergeregg umso me gnosse.
Die negscht Etappe isch de eher wieder zum entspanne gsi bis uf Willerzell, denn hät de letschti Chraftakt, de Ufstiig ufd Sattelegg, au no die letschte Chörner koschted. De Edi isch ufe wie es jungs Rehli und us mine Bei isch eifach nüt me cho. Em Hubi sini Bei sind au nur no us siner reine Willenschraft em Wiiterpedale gsi. Uf der Sattelegg isch es aber praktisch so guet wie gschafft und die 2500 hm bewältigt gsi. E chli ungwollti Action isch üs jedoch no bevor gstande. Churz vor Tugge, bim Abwziiger zur Ziegelei und uf dem wunderschöne nüe Velowäg, hät üs prompt welle e Autofahreri abschüsse. De Brems- und Reaktionstescht hämmer zum Glück alli bestande, aber cheibe knapp isches gsi. Wer doch eifach schön, würed die Autofahrer au mol chli zur Schiibe us luege und uf üs Velofahrer rücksicht neh…
Nach guet 6 Stunde Fahrzyt und 122km i de Bei isch üsi Tour z Änd gange. Danke em Veloclub Uznach für der erlebnisriiche Tag. Und s neggscht mol simmer doch gern wieder debi.
