RÜCKBLICK geschriben von Daniel Wilhelm, an der GV vorgetragen durch Bea Schwyter
Dä Summer 2017 isch heiss gsi. Ich cha mi a fasch känn Abig erinnere, wos nöd gheisse het: Dani, gömmer go bade? Dass es dänn uf de 2. Tagestour zDavos andersch usgseh hät, isch es Detail.
Uf jede Fall hät sich nach de Früehligsferie e grossi Schaar vo junge Bikerinne und Biker troffe. Ich ha brav immer dAweseheitskontrolle i minere Gruppe gmacht, bis dänn dMartina nach es paar Wuche gfunde hät, sie heg also de Überblick. Wie si das bi öppe 40 Chind gschafft hät, isch mir es Rätsel.
Aschlüssend ischs amel uf dRundi gange. Im April-Mai hät no niemert wölle go bade, aber sWätter isch meistens guet gsi und mir Leiter händ üs Müeh geh, dass mir immer chli ame andere Ort duräfahred. Villicht wär das gar nöd nötig gsi. Mini Gruppä hät emel immer gfunde: Gömmer in Buechberg?
Gwüssi Leiterinne händ au ihre Ruef. Eimal hani im Burgerwald im Gstrüpp en Wäg gsuecht, ich ha mich entschuldiget. Das wär nöd nötig gsi. Mini Jungs – öb dRea au debii gsi isch, weissi nümä, händ glachet und gseit: So isch es bi de Bea immer gsi.
Di beide Marty-Brüedere händ natürlich au bald en Fanclub gha. Bi Wheelie und Bunny Hop und eigentlich au süsch sind die beide unschlagbar.
De erschti Saisonhöhepunkt isch natürlich sClubränne im Buchsgarte gsi, au wänn det eine – bschisse hät und mit Zuesatzchraft underwägs gsii isch. Immerhin hät er bim Dart schlächt troffä.
Und denn isch es glaub bald heiss wordä und de Gömmer-go-bade-Refrain hät agfange. Ich ha immer wieder betont, dass mir en Veloclub sind und dass üses Hobby bike isch und dass bike vill cooler isch als bade, aber irgendwie bini kän guete Prediger und no weniger en Missionar. So simmer halt s’eint oder s’ander mal go bade und ich gibs ja zue: Vom Wasserfall im Aabachtobel abegumpe isch scho no cool.
Eimal simmer nöd go bade. De Florin hät sich im Buechberg e üübli Schnattere gholt und während ich ihn verarztet han, häts agfange schiffe. Und zwar so richtig, so dass mir Bikes besser gegen Kanus tuscht hetted und dBrülle gäg Taucherbrülle. Womär de Florin abgliferet gha händ und die meiste hei sind, hani mit em Nico und em Silvio im Migrosparkhuus uf em Nico sini Schwöster gwartet. Sit det Parkplätz verbreiteret worde sind, chame aso Achti fahre ufene. I beid Richtige.
Und süsch, was gits no zbrichte? Nach de Summerferie isch wiiterhin heiss gsi. Drüümal händ drü Franzose vo Eschebach dGruppe vo de Grosse chli ufgmischt und chli Tempo gmacht. Und dänn isch dZweitagestour im Schnee vesunke. Tja.
Bis zu de Herbstferie isch dänn nomal agnähm Wätter gsi. Gömmer go bade isch sälte worde und als Abschluss vonere glungene Saison simmer zu sHeules go Suppe ässe.
